ВМРО-ДПМНЕ преку соопштение реагираше на прес-конференцијата на СДСМ, оценувајќи дека младите и образованието се меѓу главните приоритети на Владата и дека во изминатиот период се реализирани значајни инвестиции во овие области.
Од партијата посочуваат дека, по седум години владеење на СДСМ и ДУИ, за првпат уште во јуни биле обезбедени бесплатни учебници за сите ученици за новата учебна година.
Според ВМРО-ДПМНЕ, буџетот за наука е зголемен од 380 милиони денари во 2024 година на 773 милиони денари во 2026 година, додека средствата за високото образование достигнале 8 милијарди денари, наспроти помалку од 3 милијарди денари во 2022 година.
Во соопштението се наведува дека е унапредено стручното образование, системски е регулирано дуалното образование, а околу 1.000 компании се вклучени во практичната обука на учениците. Дополнително, отворени се седум регионални центри за стручно образование и обука, а наскоро се очекува да биде отворен и осмиот.
Од владејачката партија истакнуваат дека е зголемена поддршката за учениците со посебни образовни потреби преку ангажирање 1.350 образовни асистенти во основното и, како што наведуваат, за првпат 150 асистенти во средното образование.
Воедно, посочуваат дека се изменети условите за стипендирање студии на најдобрите 100 светски универзитети, како и дека се доделени 55.000 ваучери од по 250 евра за набавка на електронски уреди.
Од ВМРО-ДПМНЕ наведуваат и дека преку Оперативниот план се обезбедуваат по 10.000 евра за започнување сопствен бизнис, како и финансиска поддршка за млади земјоделци, а е проширен и опфатот на субвенционираниот студентски оброк.
Во делот на образовната инфраструктура, партијата соопшти дека се инвестирани 70 милиони евра во повеќе од 90 инфраструктурни проекти.
На крајот од реакцијата, ВМРО-ДПМНЕ оценува дека СДСМ, ДУИ и Левица ги критикуваат владините политики, но додава дека Владата ќе продолжи со, како што наведуваат, инвестициите во младите и образованието.
