Мојсоска: ЕВН лани оствари над 45 милиони евра чиста добивка, а народот плаќа најскапа струја - премиерот и министерката работат за бизнис-кремот од чија соработка се купуваат часовници од 60 илјади евра

Пратеничката од Левица, Јована Мојсоска, на интерпелацијата за министерката за енергетика, рударство и минерални суровини, Сања Божиновска, ја обвини Владата дека ги штити интересите на ЕВН, додека граѓаните плаќаат високи сметки за електрична енергија.

— реклама —

Мојсоска се повика на податоци на Евростат за втората половина од 2025 година, според кои Македонија е на прво место во Западен Балкан според цената на струјата во однос на куповната моќ. Таа посочи дека домаќинствата со минимална плата издвојуваат 9,6 проценти од приходите за електрична енергија, а кај оние што се греат на струја трошокот може да достигне половина од минималната плата.

— реклама —

Според Мојсоска, и покрај намалувањето на производната цена на струјата од државната ЕСМ, граѓаните не добиваат соодветно намалување на сметките. Таа ја критикуваше и дополнителната давачка од 200 денари за пристап до мрежата, наведувајќи дека во 2025 година на ЕВН ѝ донела приходи од 38 милиони евра.

Пратеничката ја обвини Владата дека не вовела задолжително месечно отчитување на броилата, иако, според податоците што ги изнесе, ЕВН минатата година остварила чиста добивка од 45 милиони евра. Таа посочи дека граѓаните добиваат паушални сметки и се соочуваат со камати и можност за исклучување доколку доцнат со плаќањето, додека, како што рече, нема санкции за компанијата кога не ги чита броилата навреме.

— реклама —

Мојсоска предупреди и на растот на долгот на ЕСМ, кој, според нејзините податоци, до вториот квартал од 2026 година достигнал 173 милиони евра, односно бил зголемен за 77 милиони евра за две години.

Таа заклучи дека енергетската политика на Владата оди во прилог на приватниот монопол, а на штета на граѓаните. Притоа, упати обвинувања за поврзаност на премиерот и министерката со бизнис-интересите во енергетиката, споменувајќи и часовници вредни 60.000 евра.