На Русија и се „потребни“ мигранти за да се развива во услови на „напната“ демографска ситуација, изјави портпаролот на Кремљ Дмитриј Песков во интервју за агенцијата РИА Новости објавено во петокот.
Потребни се „мигранти“, рече Песков.
„Проблемот е што имаме многу напната демографска ситуација. Живееме во најголемата земја во светот, но малку сме“, објасни тој.
Во 2023 година, стапката на фертилитет во Русија беше 1,41 дете по жена во репродуктивна возраст, што е далеку од стапката потребна за надополнување на населението, според проценките на руската агенција за статистика Росстат, објавена од економскиот дневен весник РБЦ.
Според руската државна статистика, во периодот од јануари до септември 2024 година се родени 920.200 деца, што е намалување за 3,4 отсто во однос на истиот период од претходната година.
Според руските медиуми, ова е најлошата бројка од крајот на 1990-тите.
Покрај тоа, Русија трпи загуби во војната во Украина, а не ги објавува бројките. Западните извори ги проценуваат загубите на повеќе од 400.000 војници.
На 12 ноември Русија усвои закон со кој се забранува промовирање на начин на живот без деца.
„За да можеме динамично да се развиваме, да ги реализираме сите развојни проекти, потребна ни е работна сила“, нагласи Песков, потврдувајќи дека руските власти можат само да го „поздрават“ доаѓањето на мигрантите во земјата.
Кремљ ја опиша демографската ситуација во јули како „катастрофална за иднината на нацијата“.
