Рускиот хидрометеоролошки центар издаде портокалов метеоаларм за Москва поради најавениот топлотен бран што се очекува за време на викендот.
Според прогнозите, во сабота и недела, на 1 и 2 август, максималната дневна температура ќе достигне до 30 степени Целзиусови, а во недела се очекува да порасне до 31 степен, пренесува ТАСС.
Портокаловото предупредување е претпоследно ниво во системот за метеоаларми и означува опасни временски услови што можат да предизвикаат штети и други неповолни последици. Предупредувањето ќе биде во сила до 16 часот по московско време во недела.
Од Рускиот хидрометеоролошки центар појаснуваат дека за Москва за „силни горештини“ се сметаат температури од 30 степени Целзиусови или повисоки, додека за повеќето други региони во земјата прагот е поставен на 35 степени.
Метеоролозите очекуваат дека западен антициклон ќе донесе стабилно, суво и исклучително топло време во Москва и Московската област во текот на претстојниот викенд.
