Москва реагира на можноста Старлинк да се користи за напади длабоко во Русија

Кремљ остро реагираше на можноста Украина да добие пристап до сателитскиот систем Старлинк за операции против цели длабоко на руска територија. Портпаролот на Кремљ, Дмитриј Песков, оцени дека таков чекор би бил „разорувачки, потенцијално опасен и непромислен“.

— реклама —

Говорејќи за односите меѓу Русија и САД, Песков истакна дека тие и натаму не се во најдобра состојба.

Прашањето за користењето на Старлинк за воени операции во Русија се актуелизираше откако финскиот претседател Александар Стуб во интервју за „Ројтерс“ на 25 септември го повика сопственикот на „СпејсЕкс“, Илон Маск, да ја прошири покриеноста на Старлинк во Украина, особено во областите каде што се наоѓаат руски системи за лансирање балистички ракети.

— реклама —

Претходно, „Атлантик“ објави дека поранешниот украински министер за одбрана Михајло Федоров разговарал со Маск за можноста Старлинк да се користи за напади врз воени цели во Русија.

— реклама —

Според „Фајненшел тајмс“, Украина се обидувала да добие дозвола за употреба на ударни дронови опремени со Старлинк за уништување руски ракетни постројки до 200 километри од границата. За ова прашање, наводно, украинскиот претседател Володимир Зеленски разговарал и со американскиот претседател Доналд Трамп.

Од Киев неодамна беше објавено дека Маск и понатаму се противи на користењето на Старлинк за напади врз Русија. Според извори цитирани од „Киев Индепендент“, разговорите со Федоров за ова прашање не дале резултат.

На 22 септември, за време на средбата меѓу Трамп и Зеленски во Њујорк, украинската страна повторно го отворила прашањето за Старлинк. Според новинарката на „NewsMax“, Нана Саџаја, Трамп одговорил дека Украина треба да разговара со Маск за тоа.