По финалето на Светското првенство во 2018 година и освоеното трето место во 2022 година, пред хрватската фудбалска репрезентација стои нов предизвик – дали може и третпат по ред да ги надмине очекувањата на светската сцена.
„Коцкестите“ и понатаму важат за една од најконкурентните селекции, иако располагаат со ограничен број играчи во споредба со светските велесили. Предводени од селекторот Златко Далиќ и капитенот Лука Модриќ, Хрватите ќе настапат на уште еден Мундијал со амбиција да обезбедат пласман во нокаут фазата.
Во групата Л ќе играат против Англија, Гана и Панама. Англичаните важат за фаворити за првото место, додека Гана може да биде незгоден противник поради физичката подготвеност и брзината. Панама, иако е аутсајдер, континуирано напредува и не смее да биде потценета.
Хрватска релативно лесно обезбеди место на своето четврто последователно Светско првенство, со седум победи и едно реми во квалификациите. Цврстата одбрана беше нејзин главен адут, со само четири примени голови, додека нападот постигна 26 погодоци.
Искуството останува најсилното оружје на оваа генерација. Лука Модриќ и на 40-годишна возраст ќе ги влече конците во средниот ред заедно со Матео Ковачиќ, а важна улога ќе имаат и Иван Перишиќ, Андреј Крамариќ и Доминик Ливаковиќ.
Во тимот има и нова енергија преку младите сили како Јошко Гвардиол, Лука Вушковиќ, Јосип Станишиќ, Петар Сучиќ и Мартин Батурина.
Иако малкумина се подготвени да ја отпишат Хрватска, проценките се дека овојпат најреално е да го мине групниот дел како второпласирана селекција зад Англија. Повторување на успехот од претходните два Мундијали и пласман меѓу четирите најдобри, сепак, во моментов не изгледа како најверојатно сценарио.
