„Можно е намалување на ДДВ-то на горивата ако продолжи растот на цените“, рече Мицкоски

Премиерот Христијан Мицкоски изјави дека Владата внимателно ја следи состојбата со цените на горивата и дека се разгледуваат дополнителни мерки доколку продолжи растот на цените на светските пазари.

— реклама —

Одговарајќи на новинарско прашање, Мицкоски потсети дека Владата веќе донела мерка со намалување на дел од акцизите за бензините и дизел-горивата, но предупреди дека цената на нафтата повторно се приближува до психолошката граница од 100 долари за барел.

— реклама —

„Воените дејства во Заливот се заоструваат и се интензивираат, така што очигледно нè очекуваат нови предизвикувачки денови. Како Влада ќе интервенираме со дополнителни мерки, а во моментов ги анализираме сите можности. Дали ќе бидат таргетирани или општи мерки, тоа дополнително ќе се утврди“, изјави Мицкоски.

Тој нагласи дека со прогласувањето кризна состојба на целата територија на државата до октомври, Владата веќе располага со сите неопходни правни механизми за навремена реакција.

— реклама —

На прашањето дали е можно намалување на данокот на додадена вредност (ДДВ) на горивата доколку продолжи актуелната состојба, Мицкоски одговори дека и таа можност е на маса.

— реклама —

„Да, се разбира, и тоа е една од опциите. Тоа е можеби најмалку посакуваната мерка од аспект на буџетските приходи, но за нас најважен е животниот стандард на граѓаните. Секогаш кога ќе биде потребно, Владата ќе им излезе во пресрет на граѓаните“, рече Мицкоски.