Можно е нови партии да влезат во Владата, со сигурност има промена на кадри во јуни - кој заминува?

Премиерот Христијан Мицкоски најави дека во текот на јуни ќе следуваат разговори за тоа како ќе изгледа Владата во иднина, откако ќе заврши внатрепартиската реорганизација во ВМРО-ДПМНЕ.

Одговарајќи на новинарско прашање поврзано со можната реконструкција и позицијата на министерот за труд и социјала Фатмир Лимани, Мицкоски рече дека анализите се во тек, но дека засега нема конечни одлуки.

— реклама —

„Привршуваме со внатрепартиската реорганизација, очекувам овој месец да ја завршиме и во јуни да се посветиме на усогласување на ставовите за тоа како ќе изгледа Владата во иднина“, рече Мицкоски.

— реклама —

На дополнително прашање дали веќе е утврдено кој не ги исполнува очекувањата и кој би можел прв да биде заменет, премиерот посочи дека сè уште нема конечни заклучоци, но дека се прават анализи.

„Сè уште немаме така длабински размислувано, но правиме анализа, и јас лично, но и луѓето од мојот кабинет, имаме некакви индикации. Во јуни ќе имаме повеќе детали“, додаде тој.

— реклама —

Во однос на евентуална прераспределба на политичката моќ меѓу коалициските партнери, Мицкоски рече дека ВМРО-ДПМНЕ ќе настапи со свој став, базиран на анализите, но ќе ги слушне и позициите на останатите партнери во владината коалиција.

— реклама —

„Би сакале да ги слушнеме и ставовите на останатите коалициони партнери и се надевам дека како стратешка коалиција и понатаму успешно ќе продолжиме да ја водиме македонската Влада“, изјави премиерот.

На прашањето дали е можно нови партии да се приклучат во рамки на реконструкцијата, Мицкоски кратко одговори: „Сè е можно, да“.