Жозе Мурињо повторно проговори за своето ривалство со Пеп Гвардиола, но и за односот кон тренерската професија, во својот нов документарец „The Special One“ на Нетфликс.
Португалскиот тренер се осврна на одлуката на Гвардиола да направи едногодишна пауза по заминувањето од Барселона во 2012 година, признавајќи дека самиот никогаш не би направил таков чекор.
„Некои луѓе имаат потреба од едногодишна пауза, а јас го мразам тој збор. За мене, таквата пауза е слабост“, изјави Мурињо.
Гвардиола по четири години на клупата на Барселона се повлече на една година од фудбалот, а потоа се врати како тренер на Баерн Минхен. Мурињо, пак, вели дека одмор од тренерската работа никогаш не му бил потребен.
„Не зборувајте ми за слободни години. Мене никогаш не ми треба одмор. Ќе одморам кога ќе умрам“, порача Португалецот.
Мурињо додаде дека и понатаму не може да замисли момент во кој ќе се повлече од фудбалот. Тој сака да освојува уште трофеи и да работи на места каде што досега не бил, но и повторно да се враќа таму каде што веќе работел.
„Не можам ни да замислам кога ќе престанам да се занимавам со фудбал. Велам уште десет години, но можеби и повеќе. Забавно е. Сакам да освојам уште титули“, рече Мурињо.
Тој нагласи дека атмосферата на стадионите и работата пред илјадници навивачи се нешто без кое не може да го замисли својот живот.
„Мојот свет е влегувањето на фудбалски стадион пред 50.000, 90.000 или дури 100.000 навивачи. Тоа е мојот свет. Без фудбал чувствувам дека нешто ми недостига“, заклучи Мурињо.
