Откако од Обвинителството информираа дека е поднесено обвинение за случајот „Лотарија“, во кој меѓу обвинетите е и поранешниот вицепремиер Артан Груби, од Кривичниот суд соопштија дека судењето ќе започне на 24 август во 10 часот.
Основното јавно обвинителство Скопје поднело обвинение против Груби и други лица, на кои им се става на товар кривично дело злоупотреба на службената положба и овластување од член 353 од Кривичниот законик.
Предметот преку автоматска распределба е доделен на судијката Билјана Шуплиновска-Јовевски, а првото рочиште е закажано за 24 август.
Груби веќе шести месец се наоѓа во куќен притвор, а од Кривичниот суд појаснуваат дека мерката, согласно член 470 став 4 од Законот за кривичната постапка, може да трае најмногу 60 дена од денот на поднесувањето на обвинителниот предлог до завршувањето на главната расправа.
Тоа значи дека притворот може да продолжи најмногу уште 60 дена од денот на поднесувањето на обвинителниот предлог.
