На Артан Груби вечерва му истекува куќниот притвор, судот сè уште не одлучил за враќање на пасошот

Мерката куќен притвор за Артан Груби, обвинет во предметот „Државна лотарија“, истекува вечерва на полноќ. Во меѓувреме, Кривичниот суд во Скопје сè уште нема донесено одлука по неговото барање за враќање на пасошот, за кое е понудена имотна гаранција.

— реклама —

По завршувањето на мерката, Груби ќе може да се брани од слобода. Тој е меѓу обвинетите во случајот во кој се истражува сомнеж за злоупотреба на службената положба и овластувањата.

— реклама —

Според обвинението, Груби, како поранешен вицепремиер и претседавач со владина седница, дал согласност за набавка на видеолотариски терминали преку кои Државната лотарија организирала игри на среќа. Обвинителството смета дека станува збор за игри што Лотаријата немала право да ги приредува, а штетата за државниот буџет ја проценува на 9,7 милиони евра.

— реклама —

Во врска со мерките за обезбедување присуство, Груби изјавил дека нема да бега и дека тоа ќе го потврди гаранцијата што ја понудил. Неговиот бранител посочил дека гаранцијата надминува 335 илјади евра и е обезбедена со три стана.

— реклама —

Се очекува судот до крајот на денот да одлучи дали ќе го прифати барањето за враќање на пасошот.