На аукција ќе се продава „Аудито на Мерко“, почетна цена 21.800 евра

Општина Струга информира дека на 16 овој месец ќе се одржи аукција за продажба на автомобилот Ауди А6 со почетна цена од 1.344.636 денари или околу 21.800 евра.

— реклама —

Аукцијата, како што соопшти општинската прес-служба, ќе почне во 10 часот на интернет страницата e-stvari.mk.

Конечно, многу коментираниот автомобил на поранешниот градоначалник на Општина Струга ќе им се врати на граѓаните на Струга.

Преку продажбата на ова возило, кое стана вирално во медиумите во земјата и пошироко како автомобилот „со волан од змиска кожа“ или како „убавата кола“, овој подвижен имот ќе се претвори во финансиска ликвидност во буџетот на Општина Струга.

Со средствата од продажбата на автомобилот ќе се набави комбе кое ќе служи за потребите на општинската администрација и спортските клубови во градот.

Општина Струга ги информира сите граѓани на Струга и пошироко дека на 16.03.2026 година, со почеток во 10:00 часот, на интернет страницата e-stvari.mk, ќе се одржи аукција за продажба на возилото, автомобил тип Audi, модел A6.

Огласот бр. 1/2026 за продажба на подвижни предмети – патничко моторно возило, преку електронска аукција (прва објава), веќе е објавен и во Службен весник.

Почетната вредност за наддавање на аукцијата за ова возило, според проценката на овластен експерт, изнесува 1.344.636,00 денари, односно околу 21.800 евра.

Градоначалникот на Општина Струга, г. Менди Ќура, од првиот ден од преземањето на функцијата, ниту еднаш не ги користел автомобилите од возниот парк на Општина Струга, со цел максимална рационализација на високите трошоци создадени низ годините.

Воедно, ја користиме оваа прилика уште еднаш да ги демантираме невистинитите информации објавени претходно во јавноста, кои тврдеа дека почетната проценка на возилото е под пазарната цена.

Ги покануваме сите заинтересирани страни да учествуваат на соодветната аукција.

На аукцијата ќе бидат објавени сите информации за возилото, како и потребните упатства за аплицирање.

Во продолжение ќе бидат објавени и деталните спецификации на возилото, како и соодветната документација, велат од Општина Струга.