На денешен ден во 1992 година Македонија ги усвои знамето и химната како државни симболи

Периодот по осамостојувањето на Македонија беше обележан и со создавање на институциите и симболите на новата независна држава.

— реклама —

Еден од важните чекори беше направен на 11 август 1992 година, кога Собранието го утврди државното знаме, а химната „Денес над Македонија“ беше официјално потврдена како државна химна.

— реклама —

Според тогашниот Закон за знамето, државниот симбол имаше црвена основа и златно-жолто сонце со вкупно 16 зраци – осум основни и осум споредни. Законот беше изгласан на 11 август 1992 година, а беше објавен во „Службен весник“ еден ден подоцна.

— реклама —

Ова знаме се користеше во првите години од независноста, но во 1995 година беше заменето со сегашното знаме. И денес државното знаме има црвена основа и златно-жолто сонце, но со осум зраци кои се протегаат до рабовите.

Химната, за разлика од знамето, не претрпе промени. „Денес над Македонија“, со текст на Владо Малески и музика на Тодор Скаловски, и пред независноста се користела како химна, а на 11 август 1992 година беше официјално потврдена како химна на независна Македонија.