СДСМ преку соопштение оцени дека отворањето на предмет против поранешниот функционер Стефан Богоев се случува во момент кога претседателот на Европскиот совет, Антонио Кошта, повторно ја нагласил потребата од исполнување на условите за продолжување на евроинтегративниот процес на Македонија.
Од партијата тврдат дека постои сомнеж за политичка позадина на случајот и прашуваат дали станува збор за обид за дефокусирање на јавноста од критиките што, според нив, доаѓаат од Европската Унија кон Владата.
„На денот кога Антонио Кошта го потврди она што СДСМ го говори подолго време, токму тогаш се отвора предмет за Стефан Богоев“, наведуваат од СДСМ.
Во реакцијата се обвинува премиерот Христијан Мицкоски за политичко влијание врз правосудните институции, при што се посочува дека тој претходно јавно најавувал одредени истраги и апсења.
Од СДСМ велат дека додека се водат, како што ги нарекуваат, „политички спектакли“, остануваат неодговорени прашања поврзани со повеќе случаи и обвинувања за корупција што во изминатиот период ги објавувала партијата.
Според опозициската партија, наместо суштински реформи и напредок кон Европската Унија, државата се соочува со политички пресметки и обиди за пренасочување на вниманието од реалните проблеми.
СДСМ повторно повика на независно судство, независно обвинителство и воспоставување соработка со Европското јавно обвинителство, оценувајќи дека само така може да се врати довербата на граѓаните во институциите.
Од партијата истакнуваат дека законот треба да важи еднакво за сите и дека секој што го прекршил мора да одговара, без разлика на политичката припадност или функцијата што ја извршува.
