Времето што Шон „Диди“ Комбс ќе го помине во федерален затвор повторно е скратено, а според најновите информации, контроверзниот музички могул треба да биде пуштен на слобода на 23 февруари 2028 година.
56-годишниот рапер беше осуден во октомври 2025 година на 50 месеци затвор, откако беше прогласен за виновен по две точки од обвинението за превоз на лица со цел проституција.
Датумот на неговото ослободување досега беше менуван неколкупати. Првично требаше да излезе на 8 мај 2028 година, но поради прекршување на затворските правила, меѓу кои наводно и воспоставување тристран телефонски повик и консумирање домашно направен алкохол, датумот беше поместен.
Подоцна, казната му беше намалена поради учество во програма за рехабилитација од злоупотреба на дроги, а сега е одреден нов датум за неговото ослободување – 23 февруари 2028 година.
Во меѓувреме, адвокатите на добитникот на „Греми“ продолжуваат со правната битка и бараат укинување на пресудата или повторно изрекување на казната, оценувајќи дека станува збор за „изопачување на правдата“.
Комбс беше уапсен во септември 2024 година и се соочи со обвиненија за злосторничко здружување, трговија со луѓе за сексуална експлоатација и превоз со цел проституција. По долгото судење беше ослободен од потешките обвиненија, но беше осуден по две точки поврзани со превоз со цел проституција.
