На двајца државјани на Холандија им е забранет повторен влез во Индонезија, откако организирале тркачки клуб на Бали што предизвика голем скандал поради наводна дискриминација на локалното население.
Станува збор за 35-годишниот Јост Стормс и 37-годишниот Хиде ван Влит, основачи на заедницата „Entourage Bali“. Тие го напуштиле островот и заминале во Сингапур пред имиграциските власти да успеат да ги приведат.
Случајот привлече големо внимание откако на социјалните мрежи се појавија видеа и пораки од настанот, по што индонезиските власти отворија истрага.
Директорот на имиграциската служба на Бали, Хендарсам Марантоко, изјави дека постои сомнеж оти организаторите ги прекршиле прописите, дискриминирале локални жители и без потребните дозволи организирале комерцијален настан.
Контроверзиите избувнаа кога беа објавени пораки од кои произлегува дека на одредени индонезиски државјани не им било дозволено да учествуваат. Во една од нив, организатор наводно му соопштил на кандидатот дека не е прифатен затоа што е Индонезиец.
По бројните реакции во јавноста, од „Entourage Bali“ се извинија, тврдејќи дека никогаш немале намера да дискриминираат кого било.
Според нив, проблемот настанал поради грешка во автоматизираниот систем за пријавување и нагласуваат дека меѓу учесниците имало и голем број локални жители.
Организаторите соопштија дека привремено ги прекинуваат сите свои активности и настани на Бали додека случајот не биде целосно разјаснет.
