ВМРО-ДПМНЕ преку соопштение обвини дека на Венко Филипче и СДС им пречи тоа што, како што велат, Македонија напредува на европскиот пат без национални отстапки и понижувања.
Од владејачката партија тврдат дека државата е лидер во реформите и во реализацијата на Планот за раст меѓу земјите од Западен Балкан, без, како што наведуваат, продажба на идентитетот, редефинирање на историјата и релативизирање на македонските национални обележја.
„Тоа им пречи на СДС и на Филипче и затоа упорно тврдат дека без отстапки нема напредок“, наведуваат од ВМРО-ДПМНЕ, додавајќи дека граѓаните токму поради таквите политики ја испратиле СДС во опозиција.
Партијата обвини дека лидерот на СДС, Венко Филипче, ги усогласува своите ставови со позициите на официјална Бугарија и оцени дека доколку СДС повторно дојде на власт, би прифатил нови национални отстапки во процесот на евроинтеграција.
„Доколку Филипче и СДС би биле власт, веднаш би прифатиле секакви национални отстапки и повторно би ја обезличиле Македонија“, стои во соопштението на ВМРО-ДПМНЕ.
