ВМРО-ДПМНЕ преку соопштение реагира на вчерашниот настап на претседателот на СДС, Венко Филипче, обвинувајќи го дека одговорноста за состојбите во неговата партија повторно ја бара кај други.
Од владејачката партија велат дека Филипче ги напаѓал поранешните функционери и симпатизери на СДС кои јавно не се согласуваат со неговите ставови, оценувајќи дека со тоа повторно се обидува да се прикаже како различен од останатите.
ВМРО-ДПМНЕ во соопштението потсетува дека претходно Филипче ја обвинуваше нивната партија за состојбите во СДС, а сега, според нив, одговорноста ја насочува кон поранешни членови и функционери на сопствената партија.
„Никој не му е крив на Филипче што СДС се распаѓа“, наведуваат од ВМРО-ДПМНЕ, додавајќи дека, според нив, во партијата веќе подолг период постои незадоволство од неговото раководење.
Од ВМРО-ДПМНЕ тврдат и дека дел од поранешните функционери на СДС се спротивставуваат на Филипче да остане на чело на партијата и дека поради тоа се создаваат опозициски фронтови со цел негово повлекување.
Во реакцијата се упатуваат и обвинувања дека Филипче во минатото ги усогласувал своите ставови со, како што наведуваат од ВМРО-ДПМНЕ, „туѓи агенди“, надевајќи се на поддршка од странство.
Владејачката партија оценува дека СДС во изминатиот период не успеал да се наметне како силна опозиција и дека начинот на кој партијата дејствува може да доведе до дополнително губење на поддршката.
„По две години ширење паника и хаос во јавноста, СДС со Венко не успеа да направи ништо, не успеа ниту да биде опозиција“, се наведува во реакцијата.
Од ВМРО-ДПМНЕ додаваат дека состојбата во СДС, според нив, се потврдува и преку изборните резултати и јавното мислење, а Филипче го обвинуваат дека не успева да се помири со фактот дека партијата е во опозиција.
