На ГП Дојран спречен шверц на 79 килограми марихуана скриена во камион со железни профили, пет лица приведени

Царинската управа разби меѓународна криминална група поврзана со нелегална трговија со дрога, при што пет лица се приведени и против нив е поднесена кривична пријава за неовластено производство и пуштање во промет на наркотични дроги, психотропни супстанции и прекурсори.

— реклама —

Акцијата била започната по добиена разузнавачка информација, по што мобилни тимови презеле оперативни дејствија. На граничниот премин Дојран, при излез од Македонија, бил спречен обид за нелегален транспорт на 79 килограми марихуана, која, според истрагата, била наменета за турскиот пазар.

Дрогата била запленета, а возачот, државјанин на Босна и Херцеговина, бил приведен. Одделението за истраги, во соработка со ОЈО ГОКК, потоа започнало предистражна постапка за утврдување на сите лица инволвирани во случајот.

— реклама —

Во текот на предистражната постапка било утврдено дека камионот управуван од државјанинот на БиХ влегол во Македонија натоварен со железни профили, кои требало да ги превезе до Грција.

— реклама —

Според истрагата, по претходен договор со лица од Македонија, на однапред договорена локација марихуаната била претоварена во камионот. Потоа возилото било пломбирано со пломба што возачот ја имал кај себе, по што тој продолжил кон Грција.

Камионот бил пресретнат од мобилните единици на Царинската управа на граничниот премин Дојран, каде што била откриена и запленета марихуаната.

— реклама —

Од Царинската управа велат дека со акцијата повторно потврдуваат дека преку разузнавачки и оперативни дејствија и темелни истраги продолжуваат со системско сузбивање на криминалот.