Повеќе од 1.000 повици од граѓани се евидентирани на Единствениот број за итни повици 112 по силното невреме проследено со силен ветер што попладнево го зафати Скопје, информира Центарот за управување со кризи.
Според директорот на ЦУК, Мухамед Али, на повеќе локации низ главниот град се регистрирани сериозни последици од невремето. На улицата „Женевска“ број 10 паднала кровна конструкција од зграда, при што се оштетени повеќе патнички возила.
Пријавени се и паднато дрво врз моторно возило на улицата „Методија Митевски“, паднато дрво на улицата „Никола Тримпаре“, како и падната кровна конструкција на улицата „Трифун Бузев“.
Од силниот ветер е откорнат и дел од покривната конструкција на Основното општинско училиште „Владо Тасевски“. На улицата „Хелсинки“ број 5 се регистрирани две паднати дрвја, додека на улицата „Скупи“ број 89 паднати дрвја оштетиле електрични кабли, патничко возило и дел од куќа.
Покрај Скопје, штети се пријавени и во Куманово, каде на булеварот „Октомвриска револуција“ паднала кровна конструкција.
Од Центарот за управување со кризи информираат дека за сите пријавени случаи се известени надлежните служби, кои се на терен и работат на расчистување и отстранување на последиците од невремето.
