Епидемијата на ебола во Демократска Република Конго продолжува да се шири, а бројот на потврдени случаи надмина 300, додека од последиците на болеста досега починале 48 лица, соопшти Министерството за здравство на земјата.
Според официјалните податоци, заразата е регистрирана во 23 здравствени зони во покраините Итури, Северен Киву и Јужен Киву.
Најсериозна е состојбата во покраината Итури, каде што се потврдени повеќе од 260 случаи на заболени. Регионот со години се соочува со безбедносни предизвици, што дополнително ја отежнува борбата против ширењето на вирусот.
Здравствените власти предупредуваат дека напорите за справување со епидемијата се попречени од недовербата кај дел од населението, отпорот кон здравствените мерки, како и ширењето гласини и дезинформации. Особено проблематична е состојбата во главниот град на покраината, Бунија, како и во градот Низи, на североистокот на земјата.
И покрај тешката состојба, властите соопштија дека четворица пациенти успешно закрепнале и биле пуштени на домашно лекување од Евангелистичкиот медицински центар во Бунија.
Генералниот директор на Светската здравствена организација, Тедрос Аданом Гебрејесус, вчера ја заврши посетата на Конго, при што се сретна со претседателот Феликс Чисекеди. На средбите се разговарало за мерките за справување со епидемијата предизвикана од сојот Бундибугио на вирусот ебола.
Во меѓувреме, здравствените власти и меѓународните партнери отворија нов центар за лекување со капацитет од 60 болнички кревети во Бунија, додека паралелно се спроведуваат и испитувања на вакцини.
Владата соопшти и дека аеродромот во Бунија повторно е отворен за редовен сообраќај по воведувањето дополнителни мерки за здравствен надзор на патниците при влез и излез од земјата.
Аеродромот претходно беше затворен за целиот цивилен сообраќај, освен за хуманитарни летови, а властите очекуваат неговото повторно отворање да помогне во побрза испорака на медицинска опрема и хуманитарна помош.
Актуелната епидемија на ебола во Демократска Република Конго официјално беше прогласена на 15 мај.
