Над 500 семејства од Чаир и Бутел се приклучуваат на новото централно греење

Повеќе од 500 семејства од скопските општини Чаир и Бутел се приклучуваат на новиот систем за централно греење, кој треба да обезбеди поефикасно и поеколошко снабдување со топлинска енергија. Во мрежата ќе бидат вклучени и јавни и здравствени установи, меѓу кои болницата „Мајка Тереза“ и основното училиште „Хасан Приштина“.

— реклама —

Ова го соопшти министерот за животна средина и просторно планирање, Муамет Хоџа, при посетата на новата когенеративна постројка во Скопје.

— реклама —

Станува збор за приватна инвестиција вредна 2,5 милиони евра, која, според министерот, ќе овозможи посовремено производство и испорака на топлинска и електрична енергија, со намалени енергетски загуби и штетни емисии.

Хоџа истакна дека ваквите вложувања во современи технологии се важен дел од напорите за намалување на загадувањето на воздухот.

— реклама —

Дополнителна придобивка за корисниците ќе биде и пониската цена, бидејќи топлинската енергија од новата постројка ќе биде за 20 отсто поевтина во споредба со алтернативните системи за централно греење.

— реклама —

Министерот ги повика граѓаните, домаќинствата и компаниите од Чаир и Бутел да ја искористат можноста за приклучување на новата мрежа, нагласувајќи дека со тоа ќе придонесат и за намалување на сопствените трошоци и за почист воздух во Скопје.