Нафтата се приближува до 81 долар по барел поради тензиите околу Ормускиот Теснец

Цените на нафтата денеска повторно забележаа раст на меѓународните пазари, при што барелот на лондонската берза се доближи до 81 долар. Причина за новото поскапување се неизвесноста околу преговорите меѓу Иран и Оман за Ормускиот Теснец, како и извештаите за напади врз саудиски танкери во Црвеното Море и Аденскиот Залив.

— реклама —

На лондонскиот пазар барелот се тргуваше по цена од 80,90 долари, што е за 1,45 долари повеќе во однос на претходниот ден. На американскиот пазар цената достигна 76,26 долари за барел, што претставува раст од 1,04 долари.

Инвеститорите внимателно ги следат разговорите меѓу Иран и Оман за управувањето со пловниот пат низ Ормускиот Теснец, но аналитичарите предупредуваат дека постои сомнеж оти евентуален договор би можел да биде краткотраен.

— реклама —

Портпаролот на иранското Министерство за надворешни работи, Есмаил Багаи, изјави дека Иран и Оман постигнале согласност за географските координати на пловниот пат и дека работат на заедничко соопштение, под услов во процесот да не се вклучат одредени трети страни. Според информации на „Ројтерс“, предложениот договор би му овозможил на Техеран контрола врз бродовите што преку Ормускиот Теснец влегуваат во Персискиот Залив.

— реклама —

Во меѓувреме, извозот на нафта и кондензат од земјите долж Персискиот Залив во јули останал речиси непроменет и сè уште е околу 40 проценти под нивото пред почетокот на конфликтот, покажуваат податоците за поморскиот сообраќај.

Дополнителна загриженост на пазарите предизвикаа и тврдењата на јеменските Хути дека извршиле ракетни напади врз два саудиски танкери во Црвеното Море и Аденскиот Залив. Засега Саудиска Арабија не ги потврди овие информации.

Во меѓувреме, Саудиска Арабија ја намали официјалната продажна цена на суровата нафта „Араб лајт“ за азиските купувачи за септември, додека, според Организацијата на земјите извознички на нафта (ОПЕК), цената на нивната референтна кошничка во средата изнесувала 77,34 долари за барел.