Најбогатите профитираат од климатската криза: Богатството на трговците со храна пораснало за 120 милијарди долари

Најбогатите луѓе во светот заработуваат и од последиците на климатската криза, откако претходно инвестирале во индустрии што ја загадуваат животната средина. Според извештај на организацијата Оксфам, дел од нив сè повеќе вложуваат и во дејности за санирање на штетите од природни катастрофи, со што остваруваат двојна добивка од кризата.

— реклама —

Како што пренесува „Гардијан“, најбогатите 0,1 отсто од светското население се меѓу најодговорните за климатската криза поради вложувањата во загадувачки индустрии, а истовремено профитираат од последиците преку инвестиции во обновување и поправка на штетите.

— реклама —

Директорката за влијание во Оксфам, Џин Меклин, ги обвини милијардерите дека го претвораат хаосот во профит. Според неа, оние што најмалку придонеле за климатската криза ги трпат нејзините најтешки последици, додека најбогатите имаат најголеми можности да се заштитат.

Во извештајот се наведува дека кризите предизвикани од екстремни временски услови и војни често ги зголемуваат профитите на големите компании за трговија со храна, во кои доминираат милијардери. Нивното богатство од 2020 година се зголемило за 120 милијарди долари.

— реклама —

Оксфам посочува дека сушите, поплавите и бурите што ги уништуваат земјоделските култури можат да предизвикаат раст на цените на храната, од што несразмерно профитираат големите корпорации, додека малите земјоделци и потрошувачите се соочуваат со поголеми трошоци.

Како пример се наведува растот на цената на какаото за 231 отсто по екстремните временски непогоди во Западна Африка во 2024 година. Според организацијата, локалните земјоделци не почувствувале корист од поскапувањето, додека профитот го оствариле богатите сопственици на компании што ги откупиле залихите и ги препродале по повисоки цени.