Пензионираната универзитетска професорка и активистка за човекови права Мирјана Најчевска остро реагираше на средбата на министерот за надворешни работи Тимчо Муцунски со израелскиот министер за надворешни работи Гидеон Сар, оценувајќи дека Јавното обвинителство треба да поведе постапка против шефот на македонската дипломатија.
Во објава на социјалните мрежи, Најчевска наведува дека Македонија е потписничка на Римскиот статут и ја признава надлежноста на Меѓународниот кривичен суд. Таа тврди дека поради тоа Обвинителството треба да испита дали постојат основи за постапка против Муцунски, повикувајќи се на член 407-а од Кривичниот законик, кој се однесува на кривичното дело геноцид.
Според неа, средбата со претставници на израелската власт претставува сериозно нарушување на угледот на Македонија, поради што предлага Собранието да формира анкетна комисија која ќе го испита случајот и ќе предложи соодветни мерки.
Најчевска во објавата додава дека, според нејзиниот став, воспоставувањето пријателски односи со, како што наведува, сторители на најтешки злосторства против човештвото претставува прекршување на Уставот и на темелните вредности на државата.
Реакција имаше и од граѓанската иницијатива „Сите за Палестина“, од каде оценуваат дека средбата е спротивна на ставовите и барањата на дел од македонската јавност во врска со војната во Газа. Од иницијативата потсетуваат дека Муцунски по средбата соопштил оти со неговиот израелски колега ја потврдиле „одличната билатерална соработка“ меѓу двете земји и разговарале за нејзино унапредување во политиката, економијата, трговијата и инвестициите.
Муцунски, кој престојува во работна посета на Соединетите Американски Држави, претходно на „Фејсбук“ објави фотографија од средбата со Гидеон Сар, наведувајќи дека двете земји ќе продолжат да работат на продлабочување на политичкиот дијалог и економската соработка.
