Најмалку 10 лица загинаа, а повеќе од 100 се повредени во руски напад со балистички проектил врз локација во Киевската област каде што се одржувала изложба на оружје, соопштија украинските власти.
Претседателот на Украина, Володимир Зеленски, првично информираше за шест загинати и десетици повредени, но главниот државен обвинител, Руслан Кравченко, подоцна соопшти дека бројот на жртвите се искачил на најмалку 10, додека над 100 лица се повредени.
Украинското обвинителство отвори кривична истрага за можно кршење на законите и обичаите на војување, а паралелно се води и постапка за евентуална службена небрежност при организацијата на настанот. Истражителите ќе утврдуваат кој ја донел одлуката изложбата да се одржи на таа локација, какви безбедносни мерки биле преземени и дали ризиците биле соодветно проценети.
Украинскиот совет на одбранбената индустрија соопшти дека негови претставници биле присутни на локацијата, но нагласи дека не учествувал во организацијата на настанот. Оттаму апелираа до јавноста да не објавува фотографии, видеа и информации што би можеле да ја загрозат безбедноста или да ја попречат истрагата.
Нападот се случи во време кога Русија ги засилува ракетните напади врз Киев. Само неколку дена претходно, украинските власти соопштија дека руските сили во една ноќ истрелале десетици балистички проектили кон главниот град.
