Најмалку 21 лице загина во тешка сообраќајна несреќа во провинцијата Западен Кејп во Јужноафриканската Република, во која се наоѓа и Кејптаун. Во несреќата учествувале повеќе возила, соопштија националната агенција за управување со сообраќајот и локалните власти.
Несреќата се случила синоќа околу 23:30 часот на автопатот меѓу градовите Принс Алберт и Лиу-Гамка, на околу 380 километри источно од Кејптаун. Информацијата ја потврди Мунеера Али, портпаролка на покраинскиот оддел за сообраќај „Вестерн Кејп Мобилити“.
Според Државната агенција за управување со патниот сообраќај, во судирот учествувале два комбиња-такси и уште едно возило.
Неколку лица се здобиле со тешки повреди. Според првичните информации на властите, дошло до директен судир меѓу двете комбиња, по што во нив удрило и третото возило.
Комбињата-такси се еден од главните облици на јавен превоз за голем број жители на Јужноафриканската Република и често учествуваат во сообраќајни несреќи со тешки последици.
