Непалските власти започнаа со привремено закопување на стотици неидентификувани жртви од катастрофалните поплави што ја погодија хималајската област, откако размерите на трагедијата ги надминаа капацитетите на тамошните служби.
Во областа Читван, во јужниот дел на централниот Непал, телата на жртвите се закопуваат во ископани ровови што треба да служат како привремени гробници додека трае процесот на идентификација. Според властите, во катастрофата досега загинале најмалку 800 лица, а околу 3.000 се водат како исчезнати.
Одлуката предизвика незадоволство кај дел од локалното население, особено поради тоа што Непал е претежно хиндуистичка земја, каде што починатите традиционално се кремираат.
„Нашата традиција е да ги кремираме покрај реката, во кругот на најблиското семејство“, изјавила Руби Чаудхари, чии двајца роднини се водат како исчезнати. Таа смета дека погребувањето не треба да се спроведува без согласност од семејствата.
Властите, пак, објаснуваат дека станува збор за итна и привремена мерка, бидејќи форензичките служби и капацитетите на мртовечниците не можат да го обработат огромниот број жртви.
Пред два дена биле привремено закопани околу 100 тела, а полицијата зема примероци за ДНК анализа од дополнителни 50 тела пред нивното закопување.
Идентификацијата е отежната и поради тоа што надојдените реки однеле дел од телата на стотици километри од местото каде што започнале поплавите. Високата температура и влажност дополнително го забрзуваат распаѓањето на телата.
Здравствените експерти предупредуваат дека оставањето на посмртните останки на отворено може да претставува ризик за јавното здравје.
Полицискиот инспектор Анил Тапа уверува дека привремените гробници нема да бидат трајни и дека семејствата ќе можат да ги преземат телата откако ќе биде потврден идентитетот.
„Луѓето се загрижени дека ова би можеле да бидат трајни гробови, но не се. Ако подоцна некој успее да го потврди идентитетот, телото може да биде преземено и да се извршат соодветните погребни обреди“, објаснил Тапа.
Непалското Министерство за надворешни работи соопшти дека привременото закопување на неидентификуваните тела е спроведено во согласност со меѓународните протоколи за постапување со жртви при големи катастрофи, вклучително и протоколите на Меѓународниот комитет на Црвениот крст.
Властите уверуваат дека семејствата подоцна ќе можат да ги проверат податоците и, доколку е потребно, да побараат ексхумација за да ги извршат верските обреди.
