Нова ноќ на жестоки напади ја потресе Украина, при што најмалку девет лица ги загубија животите, а значително беше оштетено едно од најпознатите верски и културни обележја во Киев.
Во главниот град загинаа четворица цивили, додека во Харкив животот го загубија петмина припадници на итните служби, кои интервенирале при гаснење пожар предизвикан од нападите.
Меѓу оштетените објекти е и Успенскиот манастир од 11 век, дел од историскиот комплекс Киевско-печерска лавра. Украинската премиерка Јулија Свириденко го оцени нападот како „брутален напад врз украинскиот народ и неговото наследство“.
Украинскиот министер за надворешни работи Андриј Сибиха најави дека Киев ќе ги активира сите достапни меѓународни механизми.
„Итно ќе ги покренеме сите релевантни процедури во рамките на УНЕСКО и сите други меѓународни механизми, барајќи итни и соодветни одговори на ова варварство“, изјави Сибиха.
Според украинската војска, Русија во текот на ноќта лансирала 70 ракети и 611 дронови кон украинска територија.
„Балистичките ракети остануваат проблем за нас. Од 34-те лансирани балистички ракети, само 15 беа соборени, иако и тоа е силен резултат“, изјави портпаролот на украинските воздухопловни сили Јуриј Ихнат.
Нападите се случија непосредно пред почетокот на самитот на Г7 во Франција, каде што војната во Украина ќе биде една од главните теми на разговорите меѓу светските лидери.
Во меѓувреме, Украина возврати со напад со дронови врз руска територија. Според руските власти, во градот Тула, јужно од Москва, загинале три лица.
