Најмалку осум жртви во поплавите во Непал, повеќе лица се водат како исчезнати

Најмалку осум лица ги загубија животите во големите поплави што денеска го погодија Непал, соопшти полицијата, пренесува Ројтерс.

— реклама —

Истовремено, расте стравувањето дека бројот на жртвите може да биде значително поголем, откако свлечиште го погодило главниот граничен премин меѓу Кина и Непал на кинеска страна, во тибетскиот округ Ѓиронг.

— реклама —

Кинеската државна новинска агенција Синхуа јавува дека по свлечиштето повеќе лица се водат како исчезнати, а постојат стравувања дека има и загинати.

Поради невремето и свлечиштата, прекинати се патиштата што водат кон граничниот премин Ѓиронг, како и телекомуникациските врски и снабдувањето со електрична енергија. Спасувачките екипи веќе се на терен и трагаат по исчезнатите лица.

— реклама —

Кинескиот претседател Си Џинпинг повика на сеопфатна потрага и спасувачка операција, како и на засилување на системите за следење и рано предупредување со цел да се спречат дополнителни последици и секундарни катастрофи.

Спасувачките активности продолжуваат, додека надлежните служби се обидуваат да ги утврдат целосните размери на штетите предизвикани од поплавите и свлечиштата.