Русија во текот на ноќта изврши нов бран напади врз повеќе украински градови, при што, според досегашните информации, загинаа најмалку седум лица, а десетици други се повредени.
Во Киев бројот на загинатите се искачи на три лица, потврди шефот на Киевската градска воена администрација, Тимур Ткаченко. Според неговите информации, најмалку 29 лица се повредени, меѓу кои и две деца.
Градоначалникот на Киев, Виталиј Кличко, соопшти дека по нападите избувнале пожари во две станбени згради, едната 24-катна, а другата деветкатна. Украинската престолнина, според властите, била цел и на балистички ракети.
Во градот Днипро загинале четири лица, а најмалку 16 се повредени. Дел од повредените се наоѓаат во тешка состојба, соопшти началникот на Днипропетровската воена администрација, Олександр Хања.
„Бројот на повредените во рускиот ноќен напад врз Днипро се зголеми на 16. Овој непријателски напад однесе четири животи“, напиша Хања на Телеграм.
Напади биле регистрирани и во Харковската област, каде што, според последните информации, се повредени најмалку десет лица. Меѓу нив има и 11-годишно девојче, соопшти началникот на регионалната воена администрација, Олег Синегубов.
Спасувачките екипи и натаму работат на расчистување на последиците и проценка на материјалната штета во погодените подрачја.
Украинскиот претседател Володимир Зеленски ден претходно предупреди на можност од нов голем руски напад и ги повика граѓаните внимателно да ги следат воздушните тревоги.
Минатата недела Москва соопшти дека планира да започне „систематски удари“ врз цели во Киев поврзани со украинската војска и центрите за одлучување, а истовремено ги повика странските државјани да ја напуштат Украина.
