СДСМ преку соопштение ја обвини Владата предводена од ВМРО-ДПМНЕ дека ги изневерила ветувањата дадени на земјоделците и дека по две години владеење земјоделскиот сектор се соочува со сериозни проблеми.
Од партијата велат дека додека бил во опозиција, премиерот Христијан Мицкоски ветувал поголема финансиска поддршка, сигурен откуп и подобри услови за земјоделците, но дека денес реалноста е сосема поинаква.
„После две години власт земјоделството е на колена. Субвенциите се намалени за 40 милиони евра и постојано доцнат, откупот на земјоделски производи е намален за 46 проценти, а трошоците за производство се зголемени. Буквално нема сегмент во земјоделието каде што нема сериозен проблем“, наведуваат од СДСМ.
Како најдобар пример за, како што велат, лошата состојба во секторот, од партијата ја посочуваат кризата во сточарството и откупот на млекото.
„Откупната цена на млекото е драстично намалена за над 30 проценти и е понижувачка за сточарите. Денес литар млеко се откупува за едвај дваесетина денари, цена која не ги покрива ниту основните производствени трошоци“, соопштија од СДСМ.
Оттаму тврдат дека две млекарници во делчевскиот регион веќе најавиле прекин на откупот, што, според нив, ќе остави многу сточари без пласман и егзистенција, а кризата дополнително ќе се продлабочи.
„Дополнително, доцнат субвенциите за добиток и премиите за млеко. Во исто време, цените на млекото и млечните производи во маркетите растат. Тоа значи дека некој профитира на грбот на македонските сточари“, наведуваат од опозициската партија.
СДСМ оценува дека земјоделците дополнително се погодени и од растот на цените на горивата, а ја обвини Владата дека не презела мерки за намалување на производствените трошоци.
„Мицкоски треба да им каже на земјоделците зошто нема мерки за млекото, оризот, доматот и пиперката и зошто доцнат субвенциите. Затоа што, како што рековме, нема пари во буџетот за земјоделците поради криминални тендери“, стои во реакцијата на СДСМ.
