Претседателката на здружението „Заедно Сме Посилни“, Мирјана Мирчевска, преку објава на социјалните мрежи соопшти дека нејзиниот малолетен син бил физички нападнат додека си играл во детски парк пред ресторан во Битола.
Според нејзината објава, инцидентот се случил по семејна вечера, кога детето излегло да си игра во паркот.
„За само неколку моменти беше физички нападнат од дете на околу 10-годишна возраст. Гледав како моето дете се обидува да се одбрани од ударите и да се повлече наназад. Во паника почнав да го повикувам по име, а потоа истрчав кон него“, напиша Мирчевска.
Таа наведува дека му се обратила на детето кое, според неа, го нападнало нејзиниот син, барајќи да престане, но тврди дека наместо смирување на ситуацијата, во расправијата се вмешал повозрасен роднина на детето, кој ѝ упатил навредливи зборови.
„Му се обратив на детето со зборовите: „Престани да го удираш мојот син. Зарем дома те учат дека насилството е решение?“ Наместо ситуацијата да се смири, се вмеша повозрасен човек кој беше роднина на детето кој седеше на клупата во близина. Наместо да го осуди насилството, ми се обрати со навредливи зборови и започна вербална расправија“, вели таа
Во својата објава, Мирчевска апелира за поголема општествена одговорност во справувањето со врсничкото насилство.
„До кога врсничкото насилство ќе биде дел од нашето секојдневие? До кога возрасните ќе бидат неми набљудувачи, а понекогаш и ќе го оправдуваат или поттикнуваат таквото однесување?“, прашува таа.
На крајот од објавата, Мирчевска порача дека е време сите заедно да кажат „доста“ на врсничкото насилство.
