Напад од ВМРО-ДПМНЕ: Приоритет на Филипче нека биде СДС, не избори во странство

ВМРО-ДПМНЕ со остра реакција упати серија обвинувања кон лидерот на СДСМ, Венко Филипче, повикувајќи го да се огради од поранешниот премиер Зоран Заев.

— реклама —

Од партијата наведуваат дека Филипче и актуелното раководство на СДС треба „конечно да се дистанцираат“ од Заев и, како што тврдат, од негови „сомнителни бизнис партнери“. Во соопштението се споменуваат имиња како Миодраг Дака Давидовиќ, Александар Онишченко и Борче Марковски.

— реклама —

Како еден од случаите за кои бараат одговори, од ВМРО-ДПМНЕ ја посочуваат наводната „зделка Заев–Дака“, поврзана со урбанистички план во Тетово од 2020 година, за кој тврдат дека овозможил заработка од околу 200 милиони евра. Партијата прашува дали бил договорен процент од продажбата на становите.

Во реакцијата, Филипче е наречен „чувар на фотелјата“, а СДС е оценет како партија која е „втурната во жива кал“ и која бележи пад на изборните резултати.

— реклама —

„Приоритет број еден на Филипче треба да биде да ја стави партијата на здрави нозе, наместо да се занимава со избори во други држави“, се наведува во соопштението.

— реклама —

Од ВМРО-ДПМНЕ додаваат дека, доколку Филипче продолжи со, како што велат, „приказната на Заев“, СДС може да се соочи со дополнително слабеење на политичката сцена, при што повикуваат надлежните институции да ги истражат сите сомнежи за криминал.