Нападнати двајца новинари во Србија додека истражувале наводно купување гласови

Двајца новинари биле физички нападнати додека ја следеле изборната постапка во Србија. Станува збор за Михајло Стојковиќ од порталот „Инфо Врањске“ и Јелена Стојковиќ од весникот „Новости“, кои тврдат дека напаѓачите ги удирале и ги гаѓале со камења, додека полицијата не реагирала.

— реклама —

Инцидентот се случил на избирачко место во селото Павловац, каде што новинарите отишле по дојава за наводно купување гласови. Тие се обиделе да ја снимат ситуацијата, но група лица им пришла и се обидела да им ги одземе мобилните телефони. Новинарите успеале да ги задржат телефоните, но при заминувањето од селото биле нападнати од десетици луѓе.

— реклама —

„Јелена ја покажа својата акредитација од „Вечерње новости“. Ги извадивме телефоните и почнавме да снимаме. Не снимивме ништо конкретно, како самото купување гласови. Потоа ни пријде првата група и се обиде да ни ги одземе телефоните. Успеавме да се одбраниме, но кога тргнавме да го напуштиме селото, почна вистинскиот прогон“, изјави Стојковиќ за Н1.

Во нападот новинарката ја повредила раката, додека новинарот добил удар во телото. Тие тврдат дека биле удирани и гаѓани со камења во непосредна близина на полицајци, кои не интервенирале.

— реклама —

„Почнав да викам „Полиција, полиција!“, но тие не сметаа дека треба да притрчаат. Однесувањето на еден полицаец и еден инспектор беше катастрофално. И Јелена и јас добивме повеќе удари, а нè гаѓаа и со камења“, рече Стојковиќ.

Засега, во доставениот извештај нема дополнителни информации за евентуални приведувања или за истрагата за нападот.