Народна банка ги презентираше најновите пролетни макроекономски проекции за периодот 2026–2028 година пред претставници на дипломатскиот кор и меѓународните организации.
Гувернерот Трајко Славески истакна дека зголемената неизвесност во глобалното окружување, особено поради конфликтот на Блискиот Исток, условила умерена надолна ревизија на проекциите за растот на домашната економија, побавно стабилизирање на инфлацијата и понеповолна надворешна позиција.
На презентацијата присуствувале претставници на повеќе амбасади и меѓународни институции, меѓу кои Европска Унија, Меѓународен монетарен фонд, Светска банка и Европска банка за обнова и развој.
Според проекциите, просечната инфлација во 2026 година се очекува да изнесува 4 проценти, потоа да се намали на 3 проценти во 2027 година и на 2 проценти на среден рок.
Од Народната банка посочуваат дека монетарната политика ќе остане претпазлива, а институцијата ќе реагира доколку се зголемат инфлациските или девизните притисоци.
Растот на економијата за 2026 година е проектиран на 3,5 проценти, со очекување за забрзување на 3,8 проценти во 2027 година и 4 проценти во 2028 година.
Како главен двигател на економскиот раст и понатаму се очекуваат инвестициите, поддржани од кредитната активност.
Во однос на надворешната позиција, Народната банка очекува дефицитот на тековната сметка во 2026 година да достигне 5,7 проценти од БДП, пред сè поради повисоките трошоци за увоз на енергија.
Истовремено, се очекуваат стабилни приливи во финансиската сметка, што треба да овозможи натамошен раст на девизните резерви и одржување на стабилноста на домашната валута.
Од Народната банка оценуваат дека банкарскиот систем останува стабилен, со солидна кредитна и депозитна активност, но предупредуваат дека глобалната неизвесност и натаму претставува ризик за економските текови.
