Кредитите продолжуваат да растат, депозитите бележат пад во април

Народна банка соопшти дека во април 2026 година паричната маса бележи месечен пад од 1,3 проценти, главно поради намалувањето на краткорочните депозити.

— реклама —

Според објавените податоци, вкупните депозити се намалени за 1,4 проценти на месечно ниво, пред сè поради падот на депозитите кај корпоративниот сектор, додека депозитите на домаќинствата продолжиле да растат. На годишно ниво, депозитите се повисоки за 9,3 проценти.

— реклама —

Во исто време, вкупните кредити во април пораснале за 1 процент на месечно ниво и за 13,3 проценти на годишно ниво, како резултат на зголеменото кредитирање и на компаниите и на граѓаните.

Кредитите на корпоративниот сектор забележале годишен раст од 15 проценти, додека кредитите на домаќинствата пораснале за 11,9 проценти.

— реклама —

Кај граѓаните, најголем раст и натаму бележат потрошувачките и станбените кредити. Потрошувачките кредити во април пораснале за 1,2 проценти на месечно и 11,2 проценти на годишно ниво, додека станбените кредити бележат месечен раст од 1,3 проценти и годишен раст од 16,2 проценти.

Од Народната банка наведуваат дека депозитите на домаќинствата во април се зголемени за 1,6 проценти, а на годишно ниво за 10,5 проценти, главно поради растот на депозитните пари и краткорочните депозити во странска валута.