Европската комисија со позитивна оценка за банкарскиот сектор и Народната банка

Банкарскиот сектор во Македонија е отпорен, со солидна капитализираност, квалитетно кредитно портфолио и добра профитабилност. Ова се наведува во Извештајот на Европската комисија за напредокот на земјата за 2026 година, во кој се нотираат и активностите на Народната банка за зајакнување на финансиската стабилност и усогласување со европските стандарди.

— реклама —

Во извештајот се истакнува дека Народната банка продолжува да ја спроведува монетарната политика насочена кон одржување на ценовната стабилност, паралелно со зајакнување на макропрудентните инструменти и надзорната рамка. Посебно се издвојуваат активностите за подобро управување со ликвидноста, унапредување на монетарните инструменти и следење на климатските ризици.

— реклама —

Поради забрзаниот раст на станбените кредити, кредитирањето на градежништвото и цените на недвижностите, Народната банка ги заостри мерките за кредитирање, ги измени правилата за задолжителна резерва и ја зголеми стапката на противцикличниот заштитен слој на капиталот. Целта е ограничување на ризиците и зачувување на стабилноста на банкарскиот сектор.

Европската комисија го нотира и напредокот во усогласувањето со европската регулатива. Законот за решавање банки стапи во сила во јуни 2026 година, а во јули беше усвоена и нова методологија за управување со каматниот ризик во банкарските портфолија.

— реклама —

Напредок има и во платниот промет. Земјата е оперативно подготвена за учество во шемите на СЕПА од октомври 2025 година, а во јули 2026 година Народната банка потпиша договор со Европскиот совет за плаќања за пристапување кон шемата за инстант кредитни трансфери.

— реклама —

Од Народната банка оценуваат дека извештајот ја потврдува отпорноста на домашниот банкарски сектор и напредокот во јакнењето на финансиската стабилност. Институцијата најавува продолжување на активностите за одржување на ценовната и финансиската стабилност и усогласување со европските правила.