Народната банка најостро ги отфрла манипулациите на СДСМ: Повторуваат веќе демантирани невистини и свесно ја поткопуваат довербата на штедачите

Народната банка реагираше на новите обвинувања од СДСМ во врска со назначувањето администратор во „Алта банка“ АД Битола, оценувајќи дека станува збор за повторување на тврдења кои веќе биле демантирани и со кои, според институцијата, се извртуваат фактите.

— реклама —

Од Народната банка посочуваат дека истите наводи биле објавени во неколку медиуми, по што институцијата јавно ги појаснила законските надлежности. Сепак, како што наведуваат, СДСМ повторно ги пласирал истите тврдења, игнорирајќи го објавениот демант.

— реклама —

Во реакцијата се повикуваат на член 57 став 1, точки 3 и 4 од Законот за банките, според кој претходна согласност за именување членови на Управниот и Надзорниот одбор на банка дава Извршниот одбор на Народната банка, составен од гувернерот и вицегувернерите.

Оттаму оценуваат дека е неосновано на администраторот да му се припишуваат одлуки што ги донел друг, законски надлежен орган, и сметаат дека ваквите тврдења имаат цел да го дискредитираат.

— реклама —

Народната банка предупредува дека ширењето вакви обвинувања во момент кога институцијата презема мерки за заштита на интересите на штедачите и клиентите на „Алта банка“ може да ја наруши довербата во банкарскиот систем.

— реклама —

„Интересот на штедачите мора да биде над дневнополитичките пресметки“, порачуваат од Народната банка.