Исплатени пензиите за 556 граѓани без платежни картички

Вкупно 556 пензионери денеска подигнаа средства од филијалата на „Алта банка“ АД Битола, иако првично беа планирани околу 400 исплати. Станува збор за корисници кои имаат платежни сметки во банката, но немаат платежни картички.

— реклама —

Исплатата се одвиваше без проблеми, а на шалтерите беа услужени и граѓаните кои не добиле СМС-порака, бидејќи немале оставено телефонски број за контакт, но самостојно дошле да ги подигнат средствата. Согласно со утврдените ограничувања, секој можел да повлече до 20.000 денари, во рамките на дозволениот износ за период од две недели.

— реклама —

Во меѓувреме, на сметките на банката се уплатени и средствата за исплата на социјалната помош од Министерството за социјална политика, демографија и млади. Исплатата за корисниците треба да започне утре, 6 ноември.

— реклама —

Филијалата во Битола утре ќе работи во две смени, како и во сабота. Од Народната банка очекуваат следната недела, по завршувањето на подготовките, да бидат отворени шалтери и во другите градови.

— реклама —

Народната банка продолжува со активности за надминување на состојбата и изнаоѓање решенија за постепено и безбедно олеснување на располагањето со средствата на граѓаните и компаниите.