Гувернерот Славески: 80 години централно банкарство – независност и интегритет за идни успеси

Народната банка одбележа 80 години централно банкарство, при што гувернерот Трајко Славески порача дека независноста, професионалноста и интегритетот остануваат клучни за идниот развој на институцијата.

— реклама —

„Стабилноста ќе остане јавно добро, довербата најскапоцениот капитал, а одговорноста наша обврска“, истакна Славески на свечената академија во Музејот на Народната банка, на која присуствуваа претседателката Гордана Сиљановска-Давкова, претседателот на Собранието Африм Гаши, премиерот Христијан Мицкоски, претставници на дипломатскиот кор, бизнис-заедницата и меѓународните финансиски институции, како и сегашни и поранешни вработени.

Гувернерот нагласи дека довербата се зајакнува преку јасни одлуки, отворена комуникација и посветеност на јавниот интерес. Тој потсети дека Народната банка имала значајна улога во монетарното осамостојување на Македонија и во обезбедувањето стабилност за граѓаните.

— реклама —

Претседателката Сиљановска-Давкова оцени дека во изминатите осум децении Народната банка ги унапредила своите институционални, аналитички и оперативни капацитети, справувајќи се со домашните и меѓународните предизвици. Таа посочи дека долгогодишното наследство претставува основа за идниот развој, но и обврска за постојано јакнење на институцијата.

— реклама —

И покрај политичките и економските неизвесности, Народната банка успешно ја одржувала стабилноста на цените, домашната валута и банкарскиот систем.

Славески ги истакна усогласувањето со европските и светските стандарди, унапредувањето на финансиската стабилност и примената на високи статистички стандарди. Посебно го нагласи членството во СЕПА, со кое за помалку од една година надоместоците за прекуграничните плаќања во евра се намалени до шест пати за граѓаните и до девет пати за компаниите.

„Нашата генерација ја наследи оваа институција и нашата должност е да ја предадеме посилна, со повеќе знаење, со поголема доверба и со уште поцврсти институционални темели“, порача Славески, нагласувајќи дека Народната банка ќе продолжи да ги чува својата независност, професионалност и интегритет.