Народната банка со едукативна програма за штедење и управување со личните финансии

Народната банка од 28 октомври до 5 ноември ќе организира низа едукативни активности по повод Светскиот ден на штедењето, 31 октомври, и Деновите на финансиската писменост. Целта е да се унапредат финансиските знаења, да се поттикне штедењето и да се зголеми заштитата на граѓаните при користењето финансиски услуги.

— реклама —

Во рамките на програмата, ученици од основните и средните училишта ќе учествуваат во работилници, предавања и квизови, а ќе ја посетат и Народната банка за да се запознаат со нејзината работа. Предвидена е и трибина за значењето на штедењето за економијата и поединецот, на која средношколците ќе разговараат за парите, инвестирањето и управувањето со личните финансии.

— реклама —

На 4 ноември ќе се одржи виртуелно предавање на тема „Родова финансиска инклузија“, кое ќе го води Елизабет Наумовски, говорничка од областа на финансиското образование, која живее во Канада.

— реклама —

Во соработка со Светската банка ќе биде објавен и едукативен видеозапис за испраќање пари преку СЕПА, Единствената европска платежна област, со информации за можностите за прекугранични плаќања и приливи во евра. Предвидени се и посети на основни училишта во руралните средини, во рамките на караванот за запознавање на учениците со функциите на Народната банка.

Народната банка по 14-ти пат го одбележува Светскиот ден на штедењето, додека Деновите на финансиската писменост се организираат по десетти пат. Во активностите учествуваат и Министерството за финансии, Комисијата за надзор на пазарот на капитал, МАПАС и Агенцијата за супервизија на осигурувањето, во соработка со приватниот финансиски сектор и граѓанските здруженија.