Европските институции ја оценија монетарната политика на Народната банка како целосно усогласена со нивните препораки, што претставува највисока оценка во делот на економските политики.
Ова беше истакнато во рамки на редовниот економски и финансиски дијалог меѓу Европската Унија и земјите од Западен Балкан, Турција, Молдавија и Украина, одржан во Брисел. На состанокот учествуваше вицегувернерот на Народната банка, Игор Величковски.
Тој посочи дека ваквите оценки ја потврдуваат правилната поставеност на монетарната политика, која е насочена кон одржување на ценовната стабилност и стабилен девизен курс во услови на глобална неизвесност.
Според него, и покрај променливото надворешно окружување, домашната економија останува релативно отпорна, додека Народната банка продолжува со претпазлив пристап, фокусиран на намалување на инфлацијата и стабилизирање на инфлациските очекувања.
Величковски нагласи дека монетарната политика има клучна улога во справувањето со инфлациските притисоци, особено во услови на продолжени глобални шокови на страната на понудата, при што институцијата внимателно ги следи движењата и е подготвена за соодветна реакција за зачувување на стабилноста.
Во соопштението се наведува дека девизните резерви се одржуваат на соодветно ниво според меѓународните стандарди, што обезбедува заштита од надворешни шокови, додека банкарскиот систем останува стабилен, ликвиден и добро капитализиран, со дополнително зајакнати макропрудентни мерки поради зголемената кредитна активност.
Величковски се осврна и на новата оперативна рамка на монетарната политика, воведена во декември 2025 година, чија цел е подобрување на преносот на сигналите од основната каматна стапка и зголемување на ефикасноста на монетарната политика.
Во делот на европската интеграција беше истакнато дека приклучувањето кон СЕПА претставува значаен чекор кон финансиска интеграција со ЕУ, а Народната банка продолжува со активности за унапредување на платежната инфраструктура, вклучително и регионалниот проект за инстант плаќања заснован на клонот на ТИПС.
