Народниот правобранител отвори предмет по сопствена иницијатива за загадувањето на водата за пиење во Гостивар, со цел да утврди како дошло до нарушување на правото на граѓаните на безбедна и чиста вода.
Од Канцеларијата на Народниот правобранител соопштија дека веќе се побарани информации од Институтот за јавно здравје, Општина Гостивар, Јавното претпријатие „Комуналец“ и Центарот за јавно здравје.
„Во текот на вчерашниот ден се добиени писмени информации од овие институции. Меѓутоа, тие не се целосни бидејќи не ги содржат сите релевантни податоци и околности во врска со проблемот за загадувањето на водата. Од тие причини, Народниот правобранител ќе се обрати и до други надлежни институции со цел да се добијат конкретни информации“, соопштија од Канцеларијата на Народниот правобранител.
Случајот со загадената вода во Гостивар во меѓувреме стана предмет и на интерес на невладиниот сектор. „Транспаренси интернешнл“ во својот најнов извештај го вброи меѓу најконтроверзните случувања, оценувајќи дека претставува сериозен индикатор за можни системски слабости.
Во меѓувреме, надлежните институции и натаму апелираат водата во Гостивар да не се користи за пиење и подготовка на храна. Министерот за внатрешни работи Панче Тошковски пред два дена соопшти дека анализите покажуваат оти квалитетот на водата сè уште варира, поради што остануваат во сила препораките таа да се користи исклучиво како техничка вода.
За случајот се води и кривична постапка. Основното јавно обвинителство Гостивар на 20 јули отвори истрага против в.д. директорката на ЈП „Комуналец“ – Гостивар, Артана Асани, како и против техничкиот раководител и раководителот на Одделението за водовод, канализација и градежни работи.
Тие се осомничени за тешки дела против животната средина и природата, бидејќи, според Обвинителството, со свои дејствија предизвикале загадување на водата за пиење во системот што ја снабдува Општина Гостивар и дел од околните населени места.
