ВМРО-ДПМНЕ преку соопштение обвини дека лидерот на СДСМ, Венко Филипче, во обид да го подобри својот политички рејтинг по слабите резултати на анкетите, се залага за прифаќање на уставните измени поврзани со внесувањето на Бугарите во Уставот.
Од владејачката партија тврдат дека „демагошката програма“ на СДСМ не ја добива поддршката од граѓаните и дека последните истражувања на јавното мислење повторно покажуваат убедлива предност на ВМРО-ДПМНЕ.
„Потиснат од ваквите резултати, каде што народот јасно потврдува дека не гледа опција во СДС, Филипче се впушта во романса со Бугарија, сметајќи дека така ќе успее да им се допадне на граѓаните“, наведуваат од ВМРО-ДПМНЕ.
Партијата обвинува дека Филипче е подготвен да ги прифати уставните измени без, како што велат, јасни гаранции за македонскиот евроинтегративен процес.
„Венко Филипче се претвори во специјален бугарски пратеник кој е спремен да истурка промена на Уставот за внесување на Бугарите, сметајќи дека така ќе успее да дојде на власт, наместо со победа на избори“, стои во партиското соопштение.
Од ВМРО-ДПМНЕ посочуваат дека, според анкети на кои се повикуваат, мнозинството граѓани сметаат дека уставни измени под бугарски услови не треба да се прават без предвидлив и гарантиран пат кон членство во Европската Унија.
Во соопштението се наведува дека политиките на СДСМ кон Бугарија претставуваат продолжение на пристапот на поранешното раководство на партијата и предупредуваат дека таквиот однос дополнително ќе го намали политичкиот рејтинг на Филипче.
„Народот добро знае дека ВМРО-ДПМНЕ ќе продолжи да ги штити националните интереси и токму затоа ја добива поддршката од граѓаните“, порачуваат од владејачката партија.
