ВМРО-ДПМНЕ преку соопштение реагира на денешната прес-конференција на потпретседателката на СДСМ, Јована Тренчевска, оценувајќи дека опозициската партија повторно плаши со најави за нови поскапувања, додека, како што наведуваат од владејачката партија, официјалните економски показатели покажуваат поинаква слика.
Од ВМРО-ДПМНЕ потсетуваат дека СДСМ во изминатите две години повеќепати најавувал економски колапс, банкрот на државата и големи поскапувања, но тврдат дека ниту едно од тие сценарија не се остварило.
„Наспроти сите нивни тврдења, не само што државата не банкротира, туку по долг временски период имаме намалување на јавниот долг за 20 милиони и на државниот долг за 40 милиони евра“, наведуваат од партијата.
Во реакцијата се посочува и дека инфлацијата во јули годинава се намалила на 2,3 отсто на годишно ниво, повикувајќи се на податоците на Државниот завод за статистика.
Од ВМРО-ДПМНЕ велат дека цените на производите континуирано се следат и се преземаат мерки за нивна контрола, додавајќи дека актуелната состојба е различна од периодот кога, како што тврдат, инфлацијата за време на владеењето на СДСМ достигнувала двоцифрени стапки.
Во однос на горивата, од владејачката партија нагласуваат дека нивните цени зависат од берзанските движења, но тврдат дека Македонија и покрај тоа има најниски цени на горивата во регионот, благодарение на мерките на Владата.
Од ВМРО-ДПМНЕ се осврнаа и на критиките за откупот на пиперката, упатувајќи ја Тренчевска да се обрати до, како што наведуваат, „кланот Заев“, со оглед на нивната поврзаност со производството на ајвар.
„Наспроти најавите и црните сценарија на СДСМ, како за банкрот на државата, така и за зголемување на цените, инфлацијата падна на 2,3 проценти, јавниот и државниот долг се намалуваат, а цените на горивата се најниски во регионот“, заклучуваат од ВМРО-ДПМНЕ.
