НАТО изненаден од повлекувањето на американски војници: „Трамп ја измислил бројката“

Високи претставници на НАТО не биле претходно информирани за одлуката на американскиот претседател Доналд Трамп да повлече околу 5.000 американски војници од Германија во наредните шест до дванаесет месеци.

— реклама —

Според извештаи на „Еуроњуз“, одлуката била објавена од Пентагон без претходни консултации со сојузниците, што предизвикало изненадување и бројни отворени прашања во рамките на алијансата. Засега не е познато од кои единици ќе се повлечат војниците, ниту како тоа ќе влијае врз безбедносната структура на НАТО во Европа.

— реклама —

Трамп дополнително најавил дека намалувањето на американското воено присуство во Германија би можело да биде и поголемо од првично најавеното, но без конкретни детали за бројките или роковите.

Од НАТО посочуваат дека се во комуникација со САД за да ги разјаснат деталите, нагласувајќи дека ваквите потези ја зголемуваат потребата Европа да преземе поголема одговорност за сопствената одбрана.

— реклама —

Американски извори за „Еуроњуз“ оценуваат дека одлуката нема јасна стратегија и дека бројката од 5.000 војници е произволна, додека дел од воените аналитичари сметаат дека влијанието врз безбедноста во Европа би било ограничено поради променетиот карактер на современото војување.

— реклама —

Американските сили се присутни во Германија уште од периодот на Студената војна и моментално бројат над 36.000 војници, што се смета за важен дел од американското воено присуство во Европа.