НАТО денеска одржа состанок посветен на неодамнешните нарушувања на воздушниот простор на Полска и Романија, при што сојузниците оценија дека Русија сноси целосна одговорност за инцидентите.
На состанокот беше изразена целосна солидарност со двете земји, а главна тема беа нарушувањата на воздушниот простор на источниот дел од Алијансата.
Во изминатите недели неколку дронови навлегле во романскиот воздушен простор. Романскиот претседател Никушор Дан оцени дека е недозволиво и неприфатливо Кремљ да продолжи со ваквите нарушувања.
Во Полска, пак, на 29 јули падна крстосувачка ракета. Полскиот премиер Доналд Туск појасни дека станувало збор за вооружено беспилотно летало, за кое се претпоставува дека е руско, а се урнало на околу 50 километри од Лублин.
„Овој инцидент е уште еден непромислен чин на Русија и опасна последица од нејзината војна против Украина“, изјави генералниот секретар на НАТО, Марк Руте.
Портпаролката на НАТО, Алисон Харт, соопшти дека сојузниците изразиле солидарност со Романија и Полска и ја осудиле Русија поради, како што наведуваат, нејзините непромислени постапки.
„Сојузниците повторија дека Русија сноси целосна одговорност за нарушувањата на воздушниот простор, кои се опасни и неприфатливи и покажуваат дека Русија сè повеќе свесно прифаќа ризик“, се наведува во соопштението по состанокот.
На состанокот била потврдена и поддршката за Украина. Од НАТО порачаа дека ваквите постапки на Русија нема да ја намалат нивната посветеност кон Украина, нагласувајќи дека нејзината безбедност е поврзана и со безбедноста на сојузниците.
Романскиот амбасадор во НАТО, Дан Некулеску, ја нагласил потребата земјите членки да продолжат со вложувањата во воените капацитети за да се зајакне одбраната, особено на источниот дел од Алијансата.
Полскиот министер за одбрана Владислав Косинијак-Камиш изјави дека НАТО покажал јасна солидарност и подготвеност за „нови чекори“ за зајакнување на безбедноста, особено долж источните граници и на Балтичкото Море.
