Земјите-членки на НАТО разговарале за забрзување на програмата за набавка на дронови, откако руски дрон пред неколку дена удрил во станбена зграда во Романија, објави „Политико“, повикувајќи се на дипломатски извори.
На затворен состанок во Брисел, 32-те амбасадори на земјите-членки на Алијансата разгледувале можности за итна набавка на дронови за мисии за воздушен надзор над пограничните држави.
Романскиот претседател Никушор Дан изјавил дека е постигната согласност за забрзување на проектите на НАТО поврзани со одговорот на заканите од беспилотни летала, со цел конкретните мерки да бидат усвоени на самитот на Алијансата во Анкара, закажан за 7 и 8 јули.
„Војната на Русија против Украина продолжува да создава сериозни ризици за евроатлантската безбедност, особено во регионот на Црното Море. Затоа е важно НАТО да го зајакне своето присуство и капацитетите во Романија“, изјавил Дан.
Иницијативата добила дополнителен импулс по инцидентот во кој руски дрон удрил во станбен објект во Романија, при што биле повредени две лица. Букурешт по инцидентот побарал забрзана испорака на системи за противвоздушна одбрана.
Во последните недели НАТО ангажирал и борбени авиони за пресретнување на сомнителни дронови над Летонија и Естонија.
Од Алијансата предупредуваат дека бројот на инциденти со дронови долж источното крило се зголемува како директна последица на војната во Украина. На состанокот било разговарано и за дополнителна заштита на критичната инфраструктура во Црното Море, вклучително и романскиот гасен проект „Нептун Дип“, вреден четири милијарди евра.
