НАТО започна голема поморска вежба на Балтикот со учество на 6.000 војници

Во полското пристаниште Гдиња денеска започна традиционалната двонеделна поморска вежба на НАТО „БАЛТОПС“, во која учествуваат повеќе од 30 пловила од 15 земји и околу 6.000 припадници на вооружените сили.

— реклама —

Вежбата е предводена од Морнарицата на Соединетите Американски Држави, а ќе заврши во германскиот пристанишен град Кил.

Според германската морнарица, целта на активноста е дополнително да се зајакне присуството на Алијансата на море и да се демонстрира способноста за одвраќање и заштита на поморските патишта.

— реклама —

Германскиот контраадмирал Штефан Хајш изјави дека во рамките на вежбата ќе бидат распоредени воени бродови, чамци, морнарички авиони и беспилотни системи.

— реклама —

Главниот акцент на БАЛТОПС е обезбедување на слободата на пловидба во Балтичкото Море, кое доби дополнително стратешко значење поради војната во Украина. Од деветте држави што излегуваат на Балтикот, единствено Русија не е членка на НАТО.

Вежбата БАЛТОПС има долга историја и потекнува од времето на Студената војна. Според податоците на германската морнарица, првата значајна демонстрација на силите во рамките на оваа операција била во 1971 година, кога американскиот носач на авиони USS Intrepid, придружуван од три разурнувачи, влегол во Балтичкото Море и се доближил на околу 37 километри од тогашниот советски брег.

— реклама —

Тогашната цел била НАТО-силите да ја демонстрираат способноста за влез во Балтичкото Море и истовремено да спречат евентуален излез на непријателски воени бродови кон Северното Море и Атлантскиот Океан. Денес, БАЛТОПС останува една од најзначајните годишни поморски вежби на Алијансата во регионот.